Byrjaðir að róa

Þá erum við búnir að fara einn róður og tókst hann með ágætum þrátt fyrir smá hnökra og vanstillingar. Við byrjuðum auðvitað á því að koma með rúmfötin okkar um borð, Stjáni kom auðvitað með Manchester United rúmfötin sín sem honum þykir svo vænt um og notaði mikið þegar hann var piparsveinn en svo þegar hann hitti konuna sína þá var hann rekinn með þau útá sjó sem honum fannst afar sárt en fór svo að sætta sig við breyttar aðstæður þegar árin liðu og hefur fyrirgefið konunni sinni þessa fólskulegu árás á sig og sínar svefnvenjur. Haukur kom með afar einkenninleg rúmföt sem ketkrókur gaf honum í skóinn 1976. Þessi rúmföt bera keim af sumrinu, eru með gulu ívafi og eru frekar furðuleg ásýndar og passa ílla við glæsilegar innréttingar um borð. Haukur hefur haldið miklu ástfóstri við þessi sængurföt sem er okkur hinum alveg hulinn ráðgáta, hann hefur bersýnilega lítið fegurðarskyn á rúmfötum eins og ketkrókur. Óli aftur á móti hefur ekki séð sæng sína útbreidda um borð sem er ekkert skrýtið þar sem hann hefur ekki komið með neina sæng um borð  þar sem hann skrapp á Strikið og leitaði að vefnaðarvörubúðum og leitaði að efni í rúmföt sem Guðrún ætlar að handsauma fyrir hann á kvöldin og verður spennandi að sjá útkomuna.

En þessi fyrsti róður heppnaðist nokkuð vel og höfum við lúmskan grun um að Haukur hafi misst albinóa lúðu sem eru afar sjaldgæfa hér um slóðir, við sáum heljarinnar alhvíta skepnu synda í burtu frá bátnum og við fórum á spyrja Hauk og hann blýþrætti sem er kannski ekkert skrýtið þar sem þessi lúða hefði gert hann frægari en Kalla Bjarna.

Vorum við svo í dag að lagfæra og fínisera og erum við að verða helvíti góðir í annan túr þegar veður lægir. Skiptum við um olíu og síur eða allavega eina síu þar sem Yanmarinn hefur greinilega tekið eina síuna ástfóstri og vildi ekki láta okkur hafa hana, eftir 4 tíma baks við að losa hana ákvað Óli að við skildum fara heim að sofa, hann ætlaði nefnilega að að dreyma um síulosandi aðferðir í nótt og koma svo sprækur og fullur af eldmóði í fyrramálið og losa síuna

Allt að gerast

Það er allt að gerast hjá okkur strákunum á Geirfugli og vonumst við til að geta farið að róa á fullu um næstu helgi. En 12 volta Einar á engar húfur en við eigum ekki von á því að það tefji okkur eitthvað. Dolli og Doddi komu niður á bryggju um daginn að skoða bátinn og spurðu hvað við ætluðum að gera í stöðunni, við sögðumst bara vilja húfur og þá urðu þeir heldur grámyglulegir í framan og heimtuðu það að 6 strokka Yanmarinn yrði settur í gang svo þeir kæmust frá borði eftir að þeir hefðu lagt líf sitt og limi í hættu við að komast um borð. Lofuðu þeir að koma aftur með húfur. Það gengur þokkalega að græja bátinn en aðal málið er að við fengum loksins stæði á flotbryggjunni eftir að fiskimaður mikill hér í bæ ákvað að leggja mið undir fót og halda norður á ný mið og síðast þegar fréttist af honum þá miðaði honum vel. En ekki skal tré sjóða nema naglar séu uppurnir. Góðar stundir.

Magnaður leikur

Áhöfnin á Geirfugli er í skýjunum yfir glæstum sigri okkar manna á ítölunum frá Rómaborg. Það var aldrei spurning hvar sigurinn í þessum leik myndi enda, en 7 mörk voru kannski eitthvað sem við bjuggumst ekki við.

Erum við núna að gera klárt á veiðar og þetta tekur alltaf sinn tíma að græja allt frá grunni, en það er alltaf gaman að vita til þess að fiskurinn sem við komum til með að veiða í vor er lifandi núna. Haukur faðmaði nokkur færi í dag og var orðinn frekar góður í faðmi þegar hann kom heim, hann tók sig til og faðmaði konuna sína og við eigum ekki von á öðru en áhöfnin á Geirfugli fá nokkur faðmlög í fyrramálið. Línan er kominn og sýndist okkur þetta vera afar fiskilegir önglar.

Svo er næsti leikur hjá okkar mönnum í bikarnum á móti Watford á laugardaginn og ætla má að Elton John slái feilnótu af stressi á gamla píanóhlunkinn sinn á föstudagskvöldið.

Geirfugl GK

Geirfugl GK 66 er kominn til heimahafnar. Siglingin frá Hafnarfirði þar sem hann var smíðaður reyndist afar vel. Við fengum á okkur kaldaskít en hann fór létt í gegnum það á 16-20 mílna ferð. Þetta er Víking bátur frá Samtak. Verið er að gera klárt á veiðar og vonumst við til að geta farið af stað strax eftir páska. Óli Björn Björgvinsson er skipstjóri og eigandi bátsins og með honum í áhöfn verða þeir Haukur Einarsson og Kristján Ásgeirsson.